సాయి

షిరిడీలొ కొలువున్న సాయినాధుని ఘనత – ఇంపుగా తెలిపేము, వినుడు జనులారా!

బాలునిగ ఒకనాడు వేపనీడన జేరి – పురజనుల మన్ననలు మెండుగా దండుకొని,

యోగ సాధన కొరకు ఎచటికో తరలెళ్ళి- తిరిగి’సాయి’గ నీవు షిరిడి జేరావు!

షిరిడీలొ కొలువున్న సాయినాధుని ఘనత – ఇంపుగా తెలిపేము, వినుడు జనులారా!

ఏనోము నోచెనో ఆపాత నింబారు – నీదివ్య సాన్నిధ్యమును పొందగలిగింది,

ద్వారకామాయిగా నీ మన్ననలపొంది – తన ఒడిని నీ నెలవు చేయ గలిగింది,

షిరిడీలొ కొలువున్న సాయినాధుని ఘనత – ఇంపుగా తెలిపేము, వినుడు జనులారా!

నీపాదములు సోకి పావనంబైనట్టి – లెండివన భాగ్యమును ఏమనెంచేను?

నీ కరంబులు సోకి మొలచినా మొలకలకు – కైవల్యమే గాద జన్మ కారణము!

షిరిడీలొ కొలువున్న సాయినాధుని ఘనత – ఇంపుగా తెలిపేము, వినుడు జనులారా!

దాసగణు సేవలను మదిలోన మెచ్చి – బూటీకి నీ అస్తి నిలుపు భాగ్యమునిచ్చి,

బాయిజా మాతచే నైవేద్యముల నంది – ఆర్తజన మానసమే అమరధామ మనెంచు!

షిరిడీలొ కొలువున్న సాయినాధుని ఘనత – ఇంపుగా తెలిపేము, వినుడు జనులారా!

ధుని యన్న పేరుతో నిత్య హోమము నెరపి- పలు కర్మశేషముల నందంత మొందించి,

ఊది యే రక్షయని పంచి ఇచ్చిన వాడు- ప్రేమ మీరగ జగము నేలుచున్నాడు!

షిరిడీలొ కొలువున్న సాయినాధుని ఘనత – ఇంపుగా తెలిపేము, వినుడు జనులారా!

‘సాయి’ యన తలచితే ‘ఓయి’ అని పలికేను – వెన్నంటి తుదిదాక తన తోడు నిచ్చేను,

భాగ్యమేమని అందు సాయు భక్తులదీ – భవ బంధముల బాధ వారెరుంగనిది!

షిరిడీలొ కొలువున్న సాయినాధుని ఘనత – ఇంపుగా తెలిపేము, వినుడు జనులారా!

అలనాటి ఆసాయి నేటికీ నడయాడు – షిరిడి నేలను తలచి తరియించరండి,

పేదసాదల యందు, అన్నార్తులందెల్ల – ఆదివ్య ఛాయగని సేవచేయండి!

షిరిడీలొ కొలువున్న సాయినాధుని ఘనత – ఇంపుగా తెలిపేము, వినుడు జనులారా!

ఈతి బాధల బాపు సాయి చరితను చదివి – సర్వ వ్యాపకుడైన సాయి మహిమను ఎరిగి,

శరణు శరణని వేడి శరణు పొందండి – నిత్య ధామము జేరు తీరు తెలియండి!

షిరిడీలొ కొలువున్న సాయినాధుని ఘనత – ఇంపుగా తెలిపేము, వినుడు జనులారా!