భావరేఖ

మురళి మెచ్చిన రవమిదా? రేపల్లె నాడిన పదమిదా?

రాఘవుండై ధరణి నడచిన వాసుదేవుని ఉనికిదా?

ఏమరక నిత్యము ఉమా నాధుడు- తగిలి యుండెడి తలపిదా?

తారకంబని మునివరేణ్యులు – మునకలేసెడి మధువిదా?

రమ్యమని ఆ రమానాధుడు – మోదమొందెడి రసమిదా?

శారదై ఆ శ్యామలాంబిక – జగతికిచ్చిన సడి ఇదా?

రాధ కన్నుల జాలువారెడి – మధుర భావపు చినుకిదా?

గోపకాంతల గుండె సందడి గూర్చి పేర్చిన మాలిదా? (మాల ఇదా)

భూరి సంపద లీయగల ఈ భావరేఖల తెలుపగా,

తనువందు నిలచిన నెలత కెన్నడు – కరుణ గలుగునొ తెలుపుమా!