అందజేయుము – అంబ కరుణ

కరుణ వారాసివట – సర్వముకు సాక్షివట,

ఉచిత పధకము లెన్నొ కూర్చి పేర్చిన జగతి,

ఉనికొందినా నాడు – ఊహ బొందిన నాడు,

తొందరొందితి వేమొ తమక మొందితివేమొ,

జగదంబ కనుసన్న మోహ వాసనయందు,

వీసమైనా బాసి మననెంచ న నెంచితివొ!

ప్రాణమూదెడి నాడు పగవాడ నెంచితివొ,

పాల్కడలి పోటులకు పలుమారు ఉలికిపడి,

ఇడుము కారకుడంచు కినుక నొందేవో,

పన్నగుని పడగలకు అలుపు తోచిన నాడు,

విడచు ఊపిరి తూపు తాపమొసగిన నాడు,

విసుగొంది ఈ బొంది నందించినావో!

పలు ఫలంబులు గలిగి ఫలమేమి తండ్రీ

వాని నందెడి ఇచ్ఛ ఇగిరిపోయె!

రవి కిరణములు సోకి వికసించు కమలములు,

సహజ ధర్మము మరచి సొమ్మసిల్లె!

అనలమందిన హుతము అందరే దేవతలు,

కర్య కారణ క్రమము గతిని మరచే!

వీసమైనా లేని శాంతి నొందగ నేంచి,

వీధులంబడి తిరిగి విసిగినాడ!

వెలుగైన, రేయైన, ఉభయ సంధ్యలనైన,

సెగలు సోకెడి బ్రతుకు తగిలియుంటి!

అక్కరకు అందనీ ఆదరంబది ఏల?

అందజేయుము నాకు అంబ కరుణ!