దొంగవా?

దొంగవా

గొల్లపల్లెల దొంగవా? నువ్వ్ వెన్న ముంతల దొంగవా?

చల్లచిలికెడి గోపకాంతల – చెలువ మందెడి దొంగవా?

నీ పాద పీఠిక మదిన నిలుపుక – నిత్యపూజల జేయుచూ,

దినము గడిపెడి పుణ్యజీవుల – పుణ్యవర్జిత దొంగవా?   (పుణ్యవర్జితము = పాపము)

దివిజేంద్ర వంద్యుని వామభాగము – దొంగిలించిన దొంగవా?

దొరవు నీవని నమ్మిజేరెడి – విజిత మనసుల దొంగవా?

చేర రమ్మని, చేదుకొమ్మని, పిలువ నేర్వని షుష్క జీవుల,

మనసు నేలిడి వికట వెరపును – దోపిడెన్నడు జేతువో !

దోచుకొన దగినేది లేదని – దూరముంచకు గిరిధారా!

లేమియందున కలిగి యుండెడి – కలి కుత్సితంబుల దోచుమా!

దోపిడెందుకు దొరతనంబున – ఉన్న దారిన రావయా,

ఆయసము నీవొందబోకిక – పట్టు నన్నిక గట్టిగా!

విడువబోకిక ఎన్నడూ నను – చెరన జేర్చుము చెలునిగా!

చేవలేదని, చేతకాదని, చింత నొందకు చిన్మయా!

గురువు నీవై గురుతు దెలుపగ – ఎరుగ కుండుట సాధ్యమే!

అసాధ్య సాధన నెరుగువాడవు – సాకునన్నిక సామిగా!