బొంది నొందకు బాబయా! ఇది లంపటంబుల దొంతయా!
దొరలనైనా దొరల జేయును – దొరతనంబిదె ఎరుగయా!
దాగియున్నది – దరినె యున్నది – మిత్తి మాన్పెడి మందనీ,
మున్నెంద రందరి మునుల మాటలు – నీటి మూటల పోటయా!
నగము లెక్కిన – నదులు దాటినా – జాడ దెలియగరాదయా!
తెలయు తరి తెలియంగజేయగ – తగిన వారిట లేరయా!
బొంది నొందకు బాబయా!
అడుగు అడుగున అందముందని అవని జేరకు జీవుడా,
అడుగునున్నది అంధకారము అదుపు నొల్లదు వినుమయా!
ఆట ఇది నే నాడువాడను – నటన నీదని నమ్మబలికియు,
నాక వాసుడు – వావివరుసలు – మరచి మరుగును బొందయా!
బొంది నొందకు బాబయా!
పుణ్యమున్నది – పాపమున్నది – పొందగా పలుదారులున్నవి,
తక్కెడందున తూగగా సరి భాగమొందగ భారమన్నది,
తక్కువేదని ఎక్కువేదని వాదులాడగ లాభమేమని?
తగిలున్నవాడికి తగులువాడికి సంధి గొను తరి లేదయా!
బొంది నొందకు బాబయా!
ఫలము లున్నవి -వ్రతము లున్నవి- లెక్కమించిన క్రతువులున్నవి,
అంగములతో ఆచరింపగ – అవధెరుంగని వసతులున్నవి,
తోలెరుంగని కొండి యొక్కటి తగిలియుందీ తనువులో,
జాడవీడదు – జాలిజూడదు – తెగని తెగులది తెలియరా! బొంది నొందకు బాబయా!
Yakshavani 