సంతసము

కాల గమనము కొలత చేరింది పై సంఖ్య,

మాంస దేహపు వయసు పెరిగింది ఒక సంఖ్య,

వనమందు చిందేటి మధుర ఋుతువుల ఛాయ,

ఒక్కటైనా నాదు దేహమున పండదే?

రేయి గడచిన నాడు వెలుగు చూచెదనంచు,

వేచున్న నా కన్ను కనకుంది ఏ వెలుగు,

వెలుగు వెల్లువ లన్ని ఏ చీకటులు మ్రింగె?

ఎన్నటికి ఈ రేయి నా బ్రతుకులో తీరు?

వటవృక్ష శాఖలకు ఉపశాఖ లుదయించె

మరల మరలా మావి చిగురు తొడిగె

చిరు వెలుగు కిరణమై చింత దీర్చెడివాడు

మినుకు మని నా గూట నెపుడు వెలుగు?

శ్రావణంబులు గడచి శరత్చంద్రడు మెరిసి

విధి విధానము నందు జగతి నడచే!

జడుడనై నే నేల ఈ జగతిలో నుంటి?

జగమేలు వానికిది తగని తలపు!

తనువు తూకము చెల్లి తూలిపోవక ముందు,

తరలిరమ్మని యముడు ముంగిటరుగక ముందు,

ముదమారగా నీదు మోము జూపగ రాద!

దేహ మందిన దేహి సంతసించంగా!