కలికి వల్లిని గూడి కులికేటి సామీ – ఒలికించు నీ కరుణ పులకింపజేయ!
మెలిక గలిగిన దారి మెదల కున్నాను- గురి దారి నెరిగించి మరలింపుమయ్యా!
తలుపు లెరుగని వాకిలమరున్న కోటలో- కొలువు దీరిన సామి కదలిరావయ్యా
ఆరు ముఖములు గల్గు అందగాడవు నీవు – అదును గాదిది నీకు ఆదమరవంగా
నిలకడెరుగని మనసు నెమ్మదింపంగా – మందలింపగ రారా సురసేన విభుడా ! ||కలికి||
బిల్వార్చనకు మురియు పరమేశు తేజమా- బిలవాసమును వీడి కదలిరావయ్యా!
బిగి సంకటపు ముడిని విడదీసి మమ్మేలు –అగ్గిచూలివి నిన్నె శరణంటిమయ్యా!
శక్తిపాశము నీది – శత బాహువులు నీవి – శమ దమంబులు తెరిపి నెరిగింపుమయ్యా!||కలికి||
అంతరంగపు హోరు అణగార్చు అరకిచ్చి – తనువు తారణ తరిని మదినింపుమయ్యా!
బ్రతుకు బాటన తోడు – ఇంట నాడెడి పాప – కొలువుకూటమి నందు రగిలేటి శగలు,
ఇంతింత గానట్టి ఇరకాటముల బాధ – బాపు కొలుపువు నీవె కనికరించయ్యా! ||కలికి||
అగ్గిచూలి: అగ్నిదేవుని కొడుకు- కుమారస్వామి
Yakshavani 