నా సుతుల మది నిండు

ఆదిత్యునందలి సవితవై -ఆనందమందనుభూతివై

మమతలో మాధుర్యమై – మునిమనంబుల మధుపమై

అణువులో బ్రహ్మాండముంచిన ఆది శక్తికి శక్తివై

అసురులై చెరియించు వారల అంతరంగపు సురునివై

సాధుజన మనసీమలందలి సామరశ్యపు వీచికై

నామరూపము లలదలేనొక వింత భావపు భూమికై

కంటి చూపై మసలు నిన్నే చూపుతో నే చూడగలనో!

చేతనంబై చరియించు నిన్నే చేతనముచే చేరగలనో!

భావమునకాధారమౌ నిన్నే భావజాలమునంద గలనో!

ఘడియ ఘడియకు ఘోరకలినను వింతగా వేధించుచున్నది,,

సారహీనుడ నైతి మదినే సాధనంబును తోచకున్నది

సందుజూచుక నామనంబున సఖుడవై నువ్ సంచరింపుము

ప్రేమ రూపము సంతరించుక నా సుతుల మనముల నాక్రమింపుము

నా సుతుల మనముల నాక్రమింపుము