దొంగాట

దొంగ దొరికిన గాని –దొంగాట ముగియదే!

ఆట నియమము నెరుగు మానసా!

వేటాడి పట్టగా జగమంత వెదికేవు,

వెదుకు ‘వాని’ని పట్టు మనసా! – వెదుకగా పనిలేదు మనసా!

కంటి వెలుగగు వాని – గురుతు లెన్నగ నీవు,

జగతి వెదికెద వేల మనసా?

కనురెప్ప తెరమూసి వెనుదిరుగు తరినెరుగు,

దొంగ దొరుకును నీకు మనసా! –ఆట ముగియును నేడె మనసా!

దొంగ గురుతులు గోరి –గుహలన్ని వెదికేవు,

లోనున్న గుహ  వెదుకు  మనసా!

గూడు చెదిరిననాడు గుహ వీడి జనువాని,

గుట్టు నెరుగుము నేడె మనసా! దొంగ గూటికి జేరు మనసా!

భాను వెలుగుల లోన భాసించు ఈ జగతి,

భావనెరుగుము నీవు మనసా!

వెలుగులో కనరాక వెలుగు వెనుకన దాగు,

తిరు రూపు నెరుగవే మనసా! వెలుగులకు గతి వాడె మనసా!

యుగ యుగంబుల నుండి ఎందరో వెదికారు,

ఓడి చరితన వారి ఓటమిని నింపారు!

ఓడి నమ్మిన వారె – వాని గెలిచిన వారు,

ఓడి నిలకడ నొందు మనసా! దొంగ దొరకును నీకు మనసా!

మినుకు చుక్కల నడుమ నిండుగా నవ్వేటి ,

గగన ఛాయను గనవె మనసా!

తళుకున్న లేకున్న తరియైన గతి వాడు,

పట్టి తలపున బట్టు మనసా! తలపోయగా వాని మనసా!

ఆటలో దొంగెవరె మనసా?ఆడి తెలుయుము నేడె మనసా!