ఆరగింపుము అంబతోడుగ

సన్నబియ్యము చెరకు బెల్లము -గుమ్మపాలను జేర్చి వండితి,

ఆవుపిడకల దాలిబేర్చితి నేతి చుక్కల తోడుగా,

సరి పాకమొందగ పాయసంబును వండినానయ తీరుగా!

ఏలకులు కర్పూర పొడులను – మంచి కుంకుమ పువ్వునూ,

దోరవేగిన జీడిపప్పులు – తీపి ద్రాక్షల ఫలములూ,

జేర్చి వండిన మధుర పొంగలి – వెండి కలశమునుంచితీ,

ఆరగింపుము అంబతోడుగ – ఆదరింపుము మమ్ములా!

దీనుడను నే హీనుడంచు – వేడబోవను శంకరా!

తుంటరిని నే తగులుకుంటిని తెగని దారుల ఎన్నడో,

ఏలువాడ వనెరుక మరచితి మాయ మోహపు మత్తులో,

మరలించి మనుపుము ధాతగా – నన్నొడిన జేర్చుము తల్లిగా!