వసంత – పంచమి

శ్రీచక్ర సంచారి – చిన్ముద్ర ధారిణీ,

శ్రీవత్సముగ సేవలందు  రాణీ!

శ్రీకరంబగు పలుకు నాలోన పలికించు,

శ్రీవాణి గా నిన్ను- నేను నుతియింప!

నిర్మలత్వపు జాడ – నిర్మోహ మురిపెంబు,

నిర్గుణంబుల గుణము లెన్నగాను,

తగుభావ మొందగల అక్షరంబుల చెండు,

తీరుగా నెరిగింపు తరుణమందు!

పంచ భూతములందు చేతనర్వపు కొమ్మ,

పాంచజన్యపు మధుర నాద నెలత,

ఋతుశోభ నెరిగించు పికము పలికెడి స్వరము,

ఎన్నుకొంటవి ఏల మమ్ముబ్రోవ?

అనుదినము -ప్రతిక్షణము- ఎడమెరుగకుండా,

అవ్యాజమగు నీదు కరుణ చిలికి,

విస్తారముగ నీదు దివ్యలీలల దెలియ,

మొలిపించు మా మదిన శృతుల విత్తు!