హరియింపవె వడిగా!

ఎన్నడు గులుగును తెరపిక – ఎన్నడు నే తరిని గొందు?
ఎన్నడు నే నెరుక గొందు – ఎదనిండంగా !
ఎన్నడు నే నరమరికలు మరువగ తలుతును వానివని?
ఎవ్వని మును తలచి మునులు మాన్యత నొందె!

ఎన్నడు గులుగును నాకిక వివరంబగు విదిత బుద్ది?
ఎన్నడు నా మానసంబు మడియును తుదిగా!
ఎన్నడు నే సంగమింతు సాంత్వన నొందగ నాలో
ఎవ్వని సంగము సాంత్వన సారంగుల కిలలో! (సారంగుడు – వేటగాడు/శివుడు)

ఎన్నడు తొలగును బంధము ఎన్నడు నే బారగలుగు?
ఎన్నడు బడయుదు నే బంధంబుల మాపు తరిని?
ఎన్నడు నే నడయాడెద బంధము తొలిగెడి బాటన?
ఎవ్వని బాసిరి విబుధులు బంధంబులు తొలగా!

ఎన్నడునే నెరుక గొందు బంధపు మూలంబేదని?
ఎన్నడు మూలము మాపెడి మందాకిని కనుగొందును?
ఎన్నడు ఆసాంతంబుగ శాంతమొందు తరి తెలియును?
ఎవ్వని శాంతాకారము లిచ్చును శాంతంబున మునకా!

ఏబాంధవు బంధుత్వము బంధము లూడ్చెను మునులకు?
ఏబంధము భవబంధపు బంధము మాపును మదిలో?
ఏబంధము బాయంగా బంధువు లగుదురు ఎల్లరు?
ఎన్నగనే బంధంబున జిక్కగ నెంచిరి తపసులు !

ఎన్నగ నా పరమేశుడు ఎన్నిక జేయునదెన్నడు?
ఎడబాయని బంధము నా కందగ జేయునదెన్నడు?
ఎదనిండగ ఆ బంధపు ముడి నే మడయుటదెన్నడు?
ఎరుకగ నే నా బంధపు బాంధవు గాంచుదన్నెడు?

ఏమరపాటెరుగక నే తగు యోచన తగిలియుండ,
ఏకాంతపు జతగానిని మచ్చిక నామది ఎన్నగ,
ఏ కారణ మెంచకనే కారుణ్యాలయు తలుపగ,
ఏదీ ఆ మధుర మూర్తి హరియింపడె నన్ను!