దిక్కు

వెలి మబ్బు తొలగింక వెన్నెలలు కురియునని
వేచి యుంటిని నేను కమలాక్షు దయగోరి,
వెలి ఆయె బంధంబులు – తొలుత నే నల్లినవి,
వెతలాయె మోదములు మౌనముగ మదిలో!

తనువు నిచ్చిన తల్లి తరలి పోయెను వీడి,
వాసమిచ్చిన తండ్రి ఆమె వెంట,
బ్రతుకు దారుల వెంట వెన్నాడు బంధాలు,
పిలిచి పన్నులు గుంజె పాడియంచు!

పరువంపు పరుగులో పగలురేయీ గడిచి,
పంతమందిన బిగువు వీగిపోయే!
పలుమారు మురిపించి చేరినా చెలులంత,

పలుకరింపుల మాని తొలగిరిపుడు!

పాలుగారే వయసు ఆటపాటల గడిచె,
పాలుపంచుక తోటి సఖులతోన,
పాయసాన్నము పంచి సంతు నందితి నేను,
పాతకంబుల గంప పంచుకొనగా!

వీనులందున విందు నందించు పవనాలు,
వీణ తంత్రులు మాని మీటె నరము,
వీని జాడన జేర వెతలు దీరేనంచు,
వీధి వీధీ తిరిగి అలసినాను!

వెన్న కుడిచేవాని వెన్నలాటల జేరి,
వెదురు పాటన పలుకు కలుపుకొనుచు,
వెతల మరచేవారి తోడు తగులెడి తీరు,
వెదకి వేదన నొంది విసిగినాను!

భవసాగరము దాటు తీరునెరిగిన వారు,
భవబాధలను మాపు మంత్రమెరిగిన వారు,
భయము బాపెడి తోడు నంది నడిచెడివారు,
భవదీయుడని నన్ను చేరనగునే!

భావమున వసియించు వాసుదేవుని తలచి
భావ మాలల నల్లె మునుపు మునులు,
భాగవత రూపమౌ మహనీయు జతనొందు,
భాగ్యవంతులు నన్ను కరుణ గనరె!

తార సంగము వీడి రోహిణీ పతి నేడు,
తామసంబున మునిగె విభుని జూచి,
తాను జేరగలేని కలువ కొలనున మనిగి,
తారకంబగు పదము నందగోరె!
తగులడే ఆ విభుడు కొంత తొందరనొంది,
తరుగు ఆయువు కరిగి తొలగులోపు,
తరుణ పాదము మోపి అహము భిన్నము జేసి,
తరలించి ఈ తనువు తోడునిడగా!

వెలి మబ్బు తొలగింక వెన్నెలలు కురియునని
వేచి యుంటిని నేను కమలాక్షు దయగోరి,
వెలితి నెన్నకు నన్ను తగుదాన గాదంచు,
వెతల బాపెడి దిక్కు నీవెగాదా!