కొమ్మల నూగుచు

కొమ్మల నూగుచు నందుని బాలుడు రమ్మని పిలిచే మురళిని ఊదుచు
కోమల గానము మోసిన గాలులు – దయగని తెలుపవె నా దీనపు దశలను!

పదములు కదిలిన మువ్వలు కదులును – మువ్వలు కదిలిన అడుగులు దెలియును,
అడుగుల కదులగ కారణమేమని – పదుగురు అడుగగ ఏమని దెలుపుదు?
కదలని పదముల పరుగిడు గుండెల వేదన దెలిపవె పిల్లన గ్రోవికి ….

కొమ్మల నూగుచు నందుని బాలుడు రమ్మని పిలిచే మురళిని ఊదుచు

చల్లల చిలుకుచు లేగల జూచుచు అలసిన తనువున తరలగ లేకనే,
తనువున చల్లిన చందన గంధము – దాగక తెలుపును తరలెడి జాడను,
జాడల చాటున నలిగెడి నెచ్చెలి – వేదన దెలుపవె వెన్నల దొంగకు …

కొమ్మల నూగుచు నందుని బాలుడు రమ్మని పిలిచే మురళిని ఊదుచు…

చల్లల నమ్మెడి తరుణము గాదిది – నీరము కేగెడి సమయము గాదిది,
వంకలు లేకనె వాకిలి దాటెడి – వసతులు ఎరుగని గొల్లల పడుచును,
ఉల్లము బాసిన చెలియను నేనని – చేరగ రమ్మని తెలుపవె గాలీ..

కొమ్మల నూగుచు నందుని బాలుడు రమ్మని పిలిచే మురళిని ఊదుచు…..