చేదుకో – నంద బాలా

దూరమెంతో నడిచి అలసినానని ఎంచి,
నెమ్మదించకు నంద బాలా!
ప్రతి అడగు పై అడుగు నిన్ను జేరేనంచు,
నమ్మి నడిచేనయ్య చాలా!

బొంది నందిన నాద మానంద మొందగా,
పలుకు లెన్నో మొలచు లోనా!
రూపొందినా పలుకు నీరూపు నెన్నదే,
దోసమెవరిది? నంద బాలా!

ధరణి మొలచిన నాడు నీ జాడ నెన్నేను,
ధరణి దొల్లితి నయ్య చాలా!
మన్నంటి నా మేను మరి మోయలేనంది,
మన్నించ మరుగేల? బాలా!

వెదురు నందిన గాలి వేణు గానంబారయె,
వేదమై భువి నేలు చాలా!
బొంది నందిన గాలి లోకేగి ప్రతిసారి,
వేదనేలొందించు ? బాలా!

తనువు భారంబాయె – భయమె జీవనమాయె,
బ్రతుకు దుర్లభమాయె చాలా!
చేయిచ్చి చేదుకో చెదరి పోవక ముందె,
ఊహలో నీ రూపు బాలా!

దూరమెంతో నడిచి అలసినానని ఎంచి,
నెమ్మదించకు నంద బాలా!
ప్రతి అడగు పై అడుగు నిన్ను జేరేనంచు,
నమ్మి నడిచేనయ్య చాలా!