గొల్ల విచారణ

గోపాలుడందిన మురళి పాటలు – ఏమి తెలిపెనె గోపికా?
తేలి గాలుల గొల్లవాడల ఏమి జగడము లాడెనే?
కంటి కునుకును కొల్లజేయగ ఏమి కబురులు పంపెనే?
గుండె గూటిన జేరి ఏమని గారవించెనొ తెలుపవే!

జగమేలు రాయుడు బాలుడై మీ పల్లెసీమల వీధిలో,
గోపబాలుర సాటిగా చిరు ఆటలాడుచు తిరిగిచూ,
దుడుకు ఆటల జోరులో తన సాటివీరుల మించుచూ,
కలువ కన్నుల ఒలకబోసెడి కబురు లేమని తెలిపెనే?

పాల కడలిన వెన్న మీగడ ఎన్నడెరుగని సరసుడు,
గొల్లలిండ్లన కొల్లజేసిన వెన్న ముంతల వేడుక,
తొల్లి ఎరుగని తమకమందుచు అల్లి జేసిన రచనలు,
అందజేసిన భావ వల్లరి కొసరి కొంచెము తెలుపవె!

ధరణి నాధుడు పొన్నకొమ్మన నిలచి ఏమని తెలిపెనే?
వెన్నెలాటల వేడుకందున మర్మమేమని తెలిపెనే?
కనుల కావల నిలచి చూపై రెప్ప తలుపులు దాటుచూ,
జగము నిండెడి జీవ నాధుని జాడ ఇంచుక తెలుపవే!