నిండుమనసులు

ధరణి పంచెడి దివ్యతేజము – ధారణందున నిలిపి నిత్యము,
నిదుర లేచిన నిండుమనసులు – దారి జూసెను పరమ గురువుల!
గరుడ గమనుని గమ్యమేమని – కాలగతులకు దిశలు ఏవని,
ఎంచ నెంచని నిండుమనసులు – దారి జూసెను పరమ గురువుల!

గడచి కరిగిన కాల వాహిని – వదలి తరలిన మేలి గురుతులు,
నీడలై మది మందిరంబున – నిలచి నిత్యము నాట్యమాడగ,
మాటి మాటికి మరలిజూచుట- మాన నెంచిన పుణ్యజీవులు,
మనసు మలినము కంచికెళ్ళగ- దారి జూసెను పరమ గురువుల!
|| ధరణి పంచెడి దివ్యతేజము – ధారణందున నిలిపి నిత్యము,
నిదుర లేచిన నిండుమనసులు – దారి జూసెను పరమ గురువుల!||

వాదమెంచక వేదనొందక వెలుగు దారుల తరలు గురువుల,
జాడలందుక జగతి దారుల తరల నెంచిన బాటసారులు,
సావధానము నెంచ నెంచక ఎంచి బోధల భావనందుక,
తెరచి మనసులు చేర రమ్మని – గురుపదంబుల దారిజూసెను!!
|| ధరణి పంచెడి దివ్యతేజము – ధారణందున నిలిపి నిత్యము,
నిదుర లేచిన నిండుమనసులు – దారి జూసెను పరమ గురువుల!||