నాటి కవిత – లోని లోకం

ఈ కవిత 1980 ప్రాంతంలో రాసుకున్నది , math notebook చివరి page లలో రాసుకున్నది. ఆ పుస్తకం జాగ్రత్త చేసేడు నా పెద్ద తమ్ముడు … జీవితంలో నేను ఎంత ఎదిగానో ఎదో ఒక రోజు చూసుకుంటాను అనుకున్నాడేమో ..

కనిపించే ఈ లోకం – కనిపించని ఆ లోకం,
కలలోనే కవ్వించే కమ్మనైన సుమ రూపం,
నాలోనే ఒదిగుందట – ఎదిగిందట నాలోనే !!

కమలాలకు ప్రాణమిచ్చు – కమల విభుని (భవుని) పసి రూపం ,
కమలాసన మందు నిలచి ప్రాణమిచ్చు పతిరూపం,
కమల నయనుని మోము వెదజల్లెడి దరహాసం ,
( కమలాక్షుని ముఖబింబము వెదజల్లెడి దరహాసం ) ,
కమల హాసముతోన భాసించెడి ఆ తరుణం –

ఒదిగుందట నాలోనే – ఎదిగిందట నాలోనే !!

కలువ కన్నులలోన ప్రతిఫలించే వాడు ,
నిసి రాత్రి కొలనులో ఆటలాడే వాడు,
జిలుగు తరాల వెంట పరుగు తీసేవాడు ,
జగములను లాలించి నిదురపుచ్చేవాడు !

 నాలోనే ఉండేనట  - నాలోనే  ఎదిగేనట !!

దేవతలు దానవులు – అమరులై నచ్చరలు,
రూపు దాల్చిన వారు – రేపు తెలియని వారు,
యోగ భోగములన్ని సన్యసించిన వారు,
ముని పుంగవుల మనసు భావించు రూపాలు !!

ఒదిగున్నవట లోన – ఎదిగెనట నాలోనే !!