నిన్నె నమ్మినవారి నగుబాటు నోర్వవని ,
వింత వింతలు జేయ వింతగాదయ మాకు !
తులసి దళముల తళుకు మణుల మించేనంచు,
తూగి తరుణుల మోహమణగించి మెప్పించి,
మురిసి మురిపెమునొందు కథలు వినియున్నాము!!
అసురు గూల్చిన నాడు అలుపేరుంగని నీవు,
గొల్లలాటల అలసి సేదదీరిన కథలు,
క్రీగంట భువనముల శాసించగల కనులు ,
నంద కాంతకు దడిసి భీతిచెందిన కథలు,
జోల పాటల విన్న రామకథలో కరిగి ,
ధనువు నందగ ఉరికి తెల్లబోయిన కథలు,
విన్నకొలదీ విందు వినులండేది విందు ,
చెలుల సంగపు రుచులు పట్టి కుడిపెడి కధలు !!
చిటికెడటుకులె చాలు చెలుని కటకట దీర్ప ,
ఒక్క మెతుకే చాలు ద్రుపదు పట్టిని బ్రోవ ,
యుగము గడచిన నేమి- నిదుర మునిగిన నేమి,
బ్రోవనీవే యన్న చేరి చెలువము కుడుప!
శరణు నివేయంచు చరణమంటిన వారి ,
చేరి చెరితను మర్చి మన్ననెంచిన కధలు,
తరుగు నొల్లని కథలు నీ లీల సంగతులు ,
చెల్లు కాలము లేని చేవగల్గిన కథలు !!
రంగ రంగా యన్న ఇల్లాలి బ్రోవగా ,
అత్త ఆరళ్ళతో నలిగి నడిపిన కథలు,
పాచికలు పంచుకొని ఆటాడు సఖునికై ,
చెరకు కుప్పలు నమిలి ఘింకరించిన కథలు ,
వైశ్వానరుని సేవ వదలనొల్లని ఇంతి ,
వంటశాలను నింపి విందుజేసిన కధలు!!
కొల్ల కొల్లలు కధలు కొరతలేనీ కధలు ,
మనసు మోహము నొందు మధురమైనీ కధలు!!
చెరిత నేలినవారి చేవ నెరుగను నేను,
వందనంబని నీకు వినయమొందను నేను,
అహము నిండిన మనసు అదుపు నొల్లదు నాది,
అదునుజూసిక నీవే హరియించు అహమెల్ల,
కటిక కార్యములెన్నొ పలుమారు జేసినా ,
కారణము నీవెయని పలుకు పంతము నాది,
వాదులాడగ వలదు జీవజనకుడ వీవు,
ఆదరించిక నన్ను ఆదుకోను కథ నడుపు||
నేడైన రేపైనా మాపెప్పుడోయైన ,
నీకు తప్పని లీల – యోచనేలయ ఇంక ?
కోటాను కోట్లలో ఒక్కడని తలచేవొ ,
ఏటికీ పంతమని ఏమరచి యుండేవొ ,
ఎడబాటు ఆటలిక ఆడి అలసితిననెంచి,
చెరిపి ఈ చేరితమును చేదుకోవయ్యా !!
Yakshavani 