తోడు

జన్మ జన్మల తోడు – జంటబాయకు నన్ను,
జతనీవే జగమందు – తనువున్న ! లేకున్నా!

కలనైన ఇలనైన కలిగుండు వాడొకడు,
కలిగించునట జగతి పలుమారు ప్రతిసారి!
పలుమారు కలిగించ పంతమేలో యంచు,
ఎరిగి ఎరిగించంగ ఎవ్వరెచటున్నారో !!
ఎరుగ నెంచగబోను – తగిలుండు నన్నెపుడు !!

నాదమై నీవుండ – తాను పలుకుల పలుకు,
వెలుగువై నీవుండ – చూచు లోకమునెల్ల ,
తోలుతిత్తీ తనువు తినలేదు మనలేదు,
తగిలి ఛాయలు నీవి తన సోయగమునెంచు,
తొలగి పోవకు నీవు – ఎడబాసి చనబోకు!!

ఒకనాడు గురువంటి- ఒకనాడు సఖుడంటి,
మరియెన్నడో నిన్ను మనువాడ రమ్మంటి,
ఒడిజేర్చి ఒకనాడు లాలించి సుతుడంటి ,
ఏమన్న ఏమైన ఏనాడు ఎపుడైనా –
తోడు నీవే నాకు – ఎడబాసి చనబోకు!!

తెరపు మరపుగ ఏవో లీలగా తోచేను
తోచు కారణమేదో తోచదే ఏనాడు,
చెలిమి కారణమేదో చెల్లిపోయినదేదో
ఏది కారణమైన – ఎవరు కారకులైన,
తోడు నీవే నాకు – తెరపైన మరుపైన!!

నాటి ఊహలు నేడు- నేటి ఊసులు రేపు,
ఏనాటికానాడు ఉనికి యై ఎరుకొందు ,
ఊసులల్లిన నాటి ఏమరపు భూతమై ,
ఊసు కళలను మాపు- ఊరడిల్లదు మనసు!!
మనసు మనుపగ నీవె- నను వీడి చనబోకు!

ఎన్నడో ఏనాడో ఏతరినో ఏదరినో
పట్టితివి నాచేయి – చెదరనీయకు సుమ్మి !
చెలిమి చేతన నీవు – తనువు తెలివిడి నీవు,
తగిలుండవలె నీవె – నా తెలివి తగదాయే ,
వల్లమాలిన మరపు పలుమారు ముంచినా ,
మారాము మరపించి – జత ఎన్నడును విడకు!!

జన్మ జన్మల తోడు – జంటబాయకు నన్ను,
జతనీవే జగమందు – తనువున్న ! లేకున్నా!