Author: yakshavani

తోడు తోడని వగచి – కోరి చేరివితి విటకు,
తోడెవ్వరే నీకు – చిలకా!
తొలగి నిలచును జగతి – తరలి పొమ్మని నిన్ను,
తోడెవ్వరే నీకు – చిలకా! తోడెవ్వరే నీకు చిలుకా?

రెక్క మొలవని నాడు – వేడుకొందగ నెంచి,
వెదకి జేరితి విటకు – చిలుకా!
వేడుకల వెలిమబ్బు వెలిసి వేదన మిగిలే,
వగపేలనే వెఱ్ఱి చిలకా!
తోడు తోడని వగచి – వెదకి చేరితి విటకు,
తోడెవ్వరే నీకు చిలకా? తోడెవ్వరే నీకు చిలుకా?

పరువమొందిన రెక్క – పరచి ఎగిరెడినాడు,
పంచ తోడెంచితివి – చిలకా!
పంపకంబుల బదులు పలువేదనలు దెచ్చె,
పొగిలి ఫలమేమింక – చిలుకా!
తోడు తోడని వగచి – వెదకి జేరితి విటకు ,
తోడెవ్వరే నీకు చిలకా? తోడెవ్వరే నీకు చిలుకా?

చిరుత రెక్కలు నిమిరి – మరిపాల మునిగేవు,
మోహపడి మురియకే – చిలుకా!
రెక్క ముదిరిన మొలక – తోడొంద ఎగిరేను,
తొలిగుండుటే మెరుగు – చిలుకా!
తోడు తోడని వగచి – వెదకి జేరితి విటకు,
తోడెవ్వరే నీకు చిలుకా? తోడెవ్వరే నీకు చిలుకా?

రెక్క అలుపుమును మరచి – రేయనక పగలనక,
తిరిగి కుడిపిన కుడుపు – చిలుకా,
కుడిచి పెరిగిన కూన – ఎంచదే పాశమును,
ఏది తోడిక నీకు – చిలుకా!
తోడు తోడని వగచి – తగిలితివి ఆనాడు,
తోడెవ్వరే నీకు చిలుకా? తోడెవ్వరే నీకు చిలుకా!

అలసి నలిగిన రెక్క – ఒరిగి కదలని నాడు,
తోడెవ్వరే నీకు – చిలుకా!
జగము తొలగిన నాడు – తోడుండు జతగాని,
తోడెంచి తరియించు – చిలుకా!
తోడు తోడని వగచి – తగిలితివి ఆనాడు,
తోడెవ్వరే నీకు చిలుకా? తోడెవ్వరే నీకు చిలుకా!

తోడు విడువని తోడు – జగతి నడిపే తోడు,
ఎంచి ఎరుగుము నేడె – చిలుకా!
తొలుత జేసిన తప్పు – తలచి వగచుట మాను,
లోనున్న తోడెరుగు – చిలుకా!
తోడు తోడని వగచి – తగిలితిచి ఆనాడు,
లోనున్న తోడెరుగు చిలుకా!
లోకేశు జతజేరు – చిలుకా! లోక చింతన మాను చిలుకా!

రాధా మనో భావనా –  రాధా మనో భావనా !

యదుబాలా – గోపి వల్లభా!

రాధా  మనోభావనా!

నారద గాన – నాద విహారా

నానాహితకర – వేద విహారా

రాధా మనో భావనా – యదుబాలా గోపీ వల్లభా!

రాధా మనో భావనా!

గౌరీ వల్లభ – మానస చోర!

గోవర్ధన ధర – గోజన పోషా!

రాధా మనోభావనా – యదుబాలా గోపీ వల్లభా!

రాధా మనో భావనా!

శ్రీసతి సేవిత – శ్రిత జన పోషా!

శుకభావామృత – కారణ  సంగా!

రాధా మనోభావనా – యదుబాలా గోపీ వల్లభా!

కృిష్ణ – రాధా మనోభావనా!

Song : https://www.youtube.com/watch?v=ykdvYeoqsRU

 

ఎన్నడో గద వేణుగానము – చేరి వీనులు నిండుట,
ఎన్నడో ఆ రాధికా సతి ఎంచి నా మొర తెలుపుట,
ఎన్నడో… ఎన్నడో..
నిండు వెన్నెల నీడలో -నిదురించు పల్లెల జోలలో,
ఎంచి చేరిన వీనులు – ఎంచి ఎరిగిన ఊసులూ…
ఎన్నడో మరి ఎన్నడో …. ఎన్నడో ఎన్నడో…
ఎన్నడో గద వేణుగానము – చేరి వీనులు నిండుట!

పండు వెన్నెల పొంగులో – మైమరచి కరగిన మనసులో,
తొంగి జూసిన ఊహలో – సిరి ఎంచి అందిన ఊసులూ..
ఎన్నడో మరి ఎన్నడో …. ఎన్నడో ఎన్నడో…
ఎన్నడో గద వేణుగానము – చేరి వీనులు నిండుట!

పంత మెరుగని రోహిణీ పతి – కుమ్మరించెడి వెలుగులో,
కలికి కన్నుల కదలు కలలో – ఎంచి చేదిన ఊసులూ
ఎన్నడో మరి ఎన్నడో …. ఎన్నడో ఎన్నడో..
ఎన్నడో గద వేణుగానము – చేరి వీనులు నిండుట!

ఎన్నడో ఆ రాధికా సతి ఎంచి నా మొర తెలుపుట,
ఎన్నడో… ఎన్నడో..

నా ఓరిమింతని – ఓపగా లేననీ – ఎన్న నేనెంతటి వాడయా?
ఓరిమొసగెడి వన్నెకాడవు – సందియంబుల బాపుమా!
సమసిపోయెడి సకల జగముల – సారసంపద నీవయా!
సమయ సీమన సంచెరించెడి – అల్ప జీవుల నెరుగవా!
ఆదమరుపే అన్నపానము – పుడమి నడచెడి దారులా!
ఆదుకొనగా నిన్ను వేడగ – కాల మెక్కడ తోచదే!

కదలుటెరుగని కటిక కాలము – కనికరంబుల నెరుగదే!
తోడు నీవని వినుటెగాని – కానగా నే నెరుగనే!
కంటకంబగు కలివనంబున – కాలు ఊనగ నోర్వకే!
ఓర్వలేనని వల్లగాదని – వేదనొందితి వెరపుచే!
వెరపు బాపుము – జాడ దెలుపుము – జాలితో దరి జేరుమా!
తరుగు దారుల తగిలినా – నీ తనయనే గద గిరిధరా!

కడుపు కుడుపగ కొలువుజేసితి – ఈడు వన్నెలు తరుగగా ,
కరుగు కండలె కాసులుగ నా కంటి వెలుగును దోచెనే,
వెలతిబడి నా చూపుతో నే నెరుగకుంటినే ఏ గతీ,
గతులు గడచిన గడియలో ఏది గతియని ఎంచెదా?

పలుకగలిగిన పరువమంతా మోహపడి నే పలికితి ,
పలుకు పలుకుకు కాసుకుయగ మోదమున నే మునిగితీ,
చెల్లిపోయెను పరువమంతా కాసుకుప్పలు తరిగెనూ,
తగిన దారిది తగులుమనియెడి తోడు తెలియనె నేటికీ!

వాని వేడితె వెలతి తీరును – వీని వెడితె వెలుగు కలుగును,
ఒకరి జేరితె ఒరుగు సంపద – ఒరగజేతురటొకను మన్నన,
మందగించిన మతిఎరుంగదె – ఏది ఎంచిన మరలగలనని,
మరలు దారిని ఒరగజేసెడి వాని వైనము నెగనే!

మందగాచెడి వాడవే – నా జాడనెన్నగ తోచదా!
తోవజేసుక చేదుకొనుమా -చేదగతి ఇక నీవెగా!
వేగపడమని వేడుకొందును వేయిపదముల దేవరా!
చేదొకొమ్మని చెతులెత్తెద చెలిమి దెలిసిన దేవరా!

మురికి మగటపు మాంద్యమెంతని ఎంచబోవకు దేవరా!
నీ ఊహ బొందిన రూపమే ఇది పోలికొందుము దేవరా!
ఓరిముడిగెను ఓపకుంటిని తప్పుఒప్పుగ జేయరా!

సామగానలోలా హరీ – సామగాన లోలా హరీ,
సాధుజన విచారే – సామగాన లోలా హరీ,
మునిమానస సంచారే – మాధవ మదహర శౌరే!
సామగాన లోలా హరే!

వాసవ పరిజన సేవిత – వరనాయక సుర పూజిత,
వాణీపతి వందిత హరి వేడెద నినె కృప జూడగ,
వందిత చరణా మము గావవె – వైకుంఠాలయ వాసా!
సామగాన లోలా -హరీ – సాధుజన విచారే!
సామగాన లోలా – హరీ!

శ్రీసతి నుత మోదిత – శుక మానస సంసేవిత,
కామాంతకు నధి నాయక – కామిని పాప విమోచక,
కరిగాచిన కురు వందిత – నానా విధ విధి భంజక !
సామగాన లోలా -హరీ – సాధుజన విచారే!
సామగాన లోలా – హరీ!

నారద గాన వినోదిత నాదార్చిత వసు సేవిత,
నాగారీ అధిరోహిత నాగాసన సుఖ సేవిత,
నారీజన హిత మోదిత – నారాయణ బిరుదాంకిత
సామగాన లోలా -హరీ – సాధుజన విచారే!
మునిమానస సంచారే – మాధవ మదహర శౌరే!
సామగాన లోలా హరే!

 

నే నెరుంగని నన్ను కావుమో యనటంచు – పలుమారు పిలిచేను రంగా!
నెనరుంచి ఎరిగించు నేనెవ్వరను ఎరుక – వెరపు మాయగ నాది రంగా!
వేడుకొందును నిన్ను రంగా! వేంకటాచల వాస రంగా!

కుడుచు అన్నము నీవు కుడిపించు నది నీవు,
కుడుచు వాడెవ్వడో రంగా!
కడుచు రుచి మోహమున కడు వేదనల మునుగు,
లోనున్న వాడెవడు రంగా! లీలగా నెరిగించు రంగా!
లాలించగా నీవె రంగా! లయకారకుడ నీవె రంగా!
నేనెరుంగని నన్ను కావుమోయటంచు పలుమారు పిలిచేను రంగా!
నెనరుంచి ఎరిగించు నేనెవ్వరను ఎరుక – వెరపుమాయగ నాది రంగా!
వేడుకొందును నిన్ను రంగా! వేంకటాచల వాస రంగా!
ఎవ్వరీ నేనంచు ఎందరడిగిన గాని – మౌనమే బదులాయె రంగా!
మూగ భావన దెలియు మతి నిచ్చి మన్నించు,
మునిమానసోల్లాస రంగా! మరుగేల రా నీకు రంగా!
మముగావగా నీవె రంగా ! మధుకైట మర్దనా రంగా!
నేనెరుంగని నన్ను కావుమోయటంచు పలుమారు పిలిచేను రంగా!
నెనరుంచి ఎరిగించు నేనెవ్వరను ఎరుక – వెరపుమాయగ నాది రంగా!
వేడుకొందును నిన్ను రంగా! వేంకటాచల వాస రంగా!
మోహమొందేదెవరు ? మోహించునది ఎవరు?
మోహ కారణ మేమి రంగా?
మోహ మోదము దీరి బడలి యున్నది ఎవరు?
మొరలెరిగి ఎరిగించు రంగా! మోహ నాశక మేటి రంగా!
నేనెరుంగని నన్ను కావుమోయటంచు పలుమారు పిలిచేను రంగా!
నెనరుంచి ఎరిగించు నేనెవ్వరను ఎరుక – వెరపుమాయగ నాది రంగా!
వేడుకొందును నిన్ను రంగా! వేంకటాచల వాస రంగా!
పాప పున్నెపు పుంత పంతాన పలుమారు
తగిలి తిరునదెవరు రంగా!
పాపచింతన దీర పలుచింతనల మునిగి
పొగిలి పొరలునదెవరు రంగా!
పోలికెంచుము నాకు రంగా! పొంకాన ఎరిగించు రంగా!
నేనెరుంగని నన్ను కావుమోయటంచు పలుమారు పిలిచేను రంగా!
నెనరుంచి ఎరిగించు నేనెవ్వరను ఎరుక – వెరపుమాయగ నాది రంగా!
వేడుకొందును నిన్ను రంగా! వేంకటాచల వాస రంగా!

 

తొలిగుండగ తగునా ఓ కరుణా మయ నయనా!
తుంటరి చేతలు నావని – తొలగుండగ తగునా!
తరుణము ఏదని ఎంచకు – తగులగ నా మదినా!
తీరులు తెన్నుల నెంచకు – తెలుపగ నీ కరుణా!

పిలిచిన పలికెడివాడని పదుగురు నిను పిలువా,
పంతంబున బదులీయక తొలిగుండుట తగునా!
పలుచన జేయగ తగునా పిలిచెడి నీ చెలికాడిని?
పిలుపున లోపములెంచుచు తొలిగుండగ తగునా!
తొలిగుండగ తగునా ఓ కరుణా మయ నయనా! తొలిగుండగ తగునా!

వానరు వాలిని గూల్చుగ మాటున జేరిన వాడవు,
మాటున దాగిన అతివను కరుణను జూచిన వాడవు,
మాయల మాటున మలిగెడి మము గావక తొలగుండగ,
మోదము నొందున నీ మది – మదనాంతక శరణా!
తొలిగుండగా తగునా – ఓ కరుణా మయ నయనా !
తుంటరి చేతలు నావని – తొలగుండగా తగునా!

అంబర వీధిన రాశిగ గోళములెన్నో యుండగ,
వసుధను గావగ వెడలిన వేదాంగుడ వైన నీవు,
వసుమతి సంతును గావక తొలగంగా తగున నీకు,
వాసము జేసిన నెలవున మొలచిన మొలకల నేలక..
తొలిగుండగా తగునా – ఓ కరుణా మయ నయనా!
తుంటరి చేతలు నావని – తొలిగుండగా తగునా!

మోహపాశము దృంచి పాలింప రావె,

భవమోహ భావనల హరింప రావె,

కలిమి బలిమియు నీవె కరుణింప రావె,

అంధ మోహపు ముడుల నణగింప రావె!

దరివి నీవని ఎరిగి – దారెరుగ లేనే,

దానవాంతక నన్న దయనేల లేవా?

దురిత దూరా యింత దూరమా నీకు?

దుడుకు చేతలు నావి – దయనేల తగనా?

మోహపాశము దృంచి పాలింప రావే,

భవ మోహ భావనల హరియింప రావే!

ఆవలున్నది నీవు – అవని గాచెడి నీవు,

అంతరంగపు గిరుల ఆవరించెడి నీవు,

అదునుగాదయ నీకు ఆలసింపగ నేడు,

మనుగడెరుగని నన్ను మన్నించ రావే!

మోహపాశము దృంచి పాలింప రావే,

భవ మోహ భావనల హరియింప రావే!

మేలు మేలన నీకు మేలెంచు మాకు,

మేను వాలెడి నాడు తోడుండు మాకు,

మోహ తిమిరము  బాప భేదమా నీకు?

భవ బంధ నాశకా భారమా నీకు?

మోహపాశము దృంచి పాలింప రావే,

భవ మోహ భావనల హరింపరావే!

కలిమి బలిమియు నీవె కరుణింప రావే,

అంధ మోహపు ముడుల నణగింప రావే!

కరుణించుమో రంగా – కరుణించుమో!

కరుణించు కరుణామయ నయనా – సాగర శయనా..

కరుణించుమో రంగా – కరుణించుమో!

సేవించి నిను జేర – దాసి పుత్రుడగాను,

సంగమున నిను జేర – సుదాముడగాను!

సరస సేవల జేర – గోపకాంతనుగాను,

సాదరంబుగ నన్ను కరుణించు రంగా.. కరుణించుమో రంగా – కరుణించుమో!

లాలించ నిను జేర – సతి దేవకినిగాను,

గోరుముద్దల గుడుప – నందకాంతనుగాను!

జతజేరి కవ్వింప గోపబాలుడగాను,

సాదరంబుగ నన్ను కరుణించు రంగా … కరుణించుమో రంగా – కరుణించుమో!

కావరమ్మని పిలువ – పాంచాలి నే గాను,

కదలి రావేమనగ – కరిరాజు నే గాను!

పంతాన నిను పొంద సురవైరి నే గాను,

సాదరంబుగ నన్ను కరుణించు రంగా … కరుణించుమో రంగా కరుణించుమో!

సకలంబు నీవన్న – దైత్యసుతు నేగాను,

నాదరూపుడవన్న నారదుడ నే గాను!

సకల లీలల పొగడ – వ్యాసపుత్రుడ గాను,

సాదరంబుగ నన్ను కరుణించు రంగా .. కరుణించుమో రంగా కరుణించుమో!

నీ పానుపమరంగ – ఫణిరాజు నేగాను,

నీ పాదమూనగా – ఖగరాజు నేగాను!

కరము సోకగ నీది – వెదురు కొమ్మను గాను,

సాదరంబుగ నన్ను కరుణించు రంగా … కరుణించుమో రంగా కరుణించుమో!

కరుణించు కరుణామయ నయనా – సాగర శయనా…

కరుణించుమో రంగా .. కరుణించుమో!

నవమోహనా జూడుమా – సిరి పంతాన నినుపొంది మము మాటుజేసెను,
నవమోహనా జూడుమా…. ఒక పరి .. నవమోహనా జూడుమా..

క్షీరసాగరు పట్టి – పట్టి విడువని చేయి,
పట్టి వెన్నల దోచి – పట్టుబడి దొంగంచు ,
పట్టి పంతము మీర – పలుమారు దండింప,
పట్టి కొంగున జేరి – గారవించే వాడ!       ||నవమోహనా జూడుమా…. ఒక పరి||

వసుధ వేడగ వచ్చి – వసుమతినె మరచేవొ,
జలజాక్షి జతలోనె జగమెల్ల జూసేవొ,
జామురాతిరి దాటె జాడైన గనరాదుర,
రాధామనోధార – ధరనేల దిగిరారా!       ||నవమోహనా జూడుమా…. ఒక పరి||

గొల్లపల్లెలు నిన్ను గోవిందుడని గొలువ,
విందులందుచు మమ్ము మరచియున్నావో,
పల్లెవాసులమయ్య రేపగలు తలచేము,
మనసార నినుజేర పురసీమ విడలేము …   ||నవమోహనా జూడుమా…. ఒక పరి||

అల  మేలు గొలుపంగ ఆలించు మామొరలు
ఆలించి లాలించి పాలింపగా నీవె,
పులకింప మామేను పలికించు నీమురళి
మురవైరి ముదమార మదినేల రావేల      ||నవమోహనా జూడుమా…. ఒక పరి||