ఆది అంతము లేని ఆనందరూపుడా – అలరారు ఆనంద అరవింద లోచనా !
అంతరంగపు రంగ మమరుండు యోచనా – అంది యోచన రూపు నలరారు తేజమా!
లోనన్న ఒక చోటు లోపించు లోచనా – లోకమంతా తానె నిండున్నా యోచనా!
లోపమెన్నగలేని లయలొందు లాస్యమా – లోతెరుగ లేనట్టి లోతైన భావమా !
రమ్యమగు నీ ఉనికి భావింప భాగ్యంబు – రసమయంబగు రీతి భాసించు భావనలు,
రమణీయమగు నీదు మోహ మాయను దెలియ – రజోగుణములు రగిలి రాజిల్లవలెనా?
చతురానుని మదిన చిరు అంశవైనీవు – చతురతగ నెరిగింప నెరుగొందె నతడు,
చలనమొందెడి తావు ఇరువెరుంగని నీదు – చక్కదనమును పొగడ పదముగలదె!
సాటిలేనీ ప్రతిభ ప్రభవించు భావముల – సారమెరుగగ గలుగు సాధ్వులెవరు?
సావధానము నొంది శోధించవలెగాని – సాధుమానస వర్తి నెరుగ గలమే!
అంబుజాసను ధాత అరవింద నయనముల – అందచందము లెంచ అలవి యగునే!
అణువణువు తానుగా భాసించు భాస్కరుడు – అనుభవముకే గాని విదతమగునే!
వాణీశుడెరిగినా మూలపురుషుని రూపు – జగతి మూలమనెంచె మానసమునా!
జగమె తానగు రూపు కట్టడికి తగదంచు – జగమెరుంగగ దెలుపు ధీరుడెవరు?
మందహాసము చిందు మధురానను కనిన – మధుర భావన పొంగి పొరలుగాదె!
మదినిండినా తరిన మూగదనమేగాని – మణులు మాణిక్యాలు మెదల గలవె!
కనువిందు జేసేటి కరుణాంతరంగుండు – కదిలి మది జేరేటి దారి దెలిసి,
కరుణగొన్నా విభుని కొనియాడ తరమౌనె – కర్ణకుహరపు దారి తెరచి ఉంచి!
Yakshavani 