Yakshavani

కన్ను లెరుగనివాడు – కంటి వెలుగగువాడు
యోచనన్దే గాని ఎదుట నిలువనివాడు,
లోనుండి ఏవేవో ఎరుక పరచెడి వాడు,
ఎన్నడో కద నన్ను కరుణ గొన నెంచు!

నాడెన్నడో ధరణి నడిచినా డంటారు,
నమ్మి కొలిచెడివారి చెలికాడననంటారు ,
నామ మందినవారి జత గాడననంటారు,
ఎన్నడో కద నన్ను ఎలినా డంటారు !!

వారు వీరెరిగిరని ఎరిగించు కథలెన్నో,
కనుల గాంచిన వారి వివరణలు ఎన్నెన్నో,
నమ్మ కుండిన నన్ను పెడవాడననంటారు,
నమ్మ నాకొక తెరవు తెలియనగు నెపుడో!!

జగతి నడతకు వాడే ఆధార మంటారు,
తనువు తెలివికి వాడే కారకుండంటారు,
తావులన్నిట తానె తారాడు సంసారి,
సందు జేసుక నాకు శరణీయునెపుడో !!

తనువు లోపలి హంస సోహమని అంటారు,
నాడులన్నిట నడుచు సామమని అంటారు,
అంతరంగము లోన అణువంత వెలుగువై ,
వెలయు నిను తెలియగల తెరవిచ్చుటెపుడో !!

అక్షయంబగు పదములంతమౌతున్నాయి ,
అవని తన పనితనము తిరిగీయమంటోంది,
ఆదరించగ నీవు యోచనలనిక మాను,
పోవ తావులు లేవు – నీ చరణకే శరణు!

వట్టి వావడను అయిన-గట్టివాడను అయినా ,
నీవు కూర్చిన వాడ – నీవాడనే నేను,
మాయలో మరగి నే మరపు నొందినగాని,
మాయ కూర్చిన నీవు – నను మరువ తగునా!

నేర్పుతో కూర్చినా పొరలన్నీ తొలగించు,
మాలిమితో మలినముల మొదలంట తొలగించు,
నీ వాడనగునట్లు ననునివే సవరించు,
సావకాశము మాని సావధానమునొందు!

చెండ శాసనుడైన నీ బంటు నిలువడట,
ధరణి తన ధాతువుల అరువునిక ఈయదట,
అంగ వాహకుడింక అలసత్వమొందడట,
జగతి నిండిన నీకు- జేర నను జాగేల!!

పొంతనెరుగని పాత ప్రారబ్ధ సంచితపు,
సవరణలన్నియు నీవే – చెల్లజేయఁగ నీవే,
పలుమారు నిను వేడి పంతమాడగ లేను,
పిన్నవాడని నీవే కరుణగొని దరిజేర్చు!!

ఏమరపు యోచనల ఏల మునిగేదవైయ్యా ,
ఎవ్వరో పిలిచిరని – ఎవ్వరో తలచిరని ,
జగతి నిండిన వాడ – జలమేలయ నీకు,
ఏలుకోనగా నన్ను – ఇత్తరినె మేలుకో !!!!!!!

మేలుకొని ఈ క్షణమే శరణిచ్చి ఏలుకో !!
మేలుకొని ఈ క్షణమే శరణిచ్చి ఏలుకో !!

నిన్ను ఒల్లని తెలివి ఒల్లకుండెడి తెలివి ,
తగిలియుండెడి తెలివి నెనరుంచి కలిగించు!
కనగలుగు జగమెల్ల కనువిందుగా నిన్నే,
కనగలుగు కనులిచ్చి కరుణతో కరుణించు!!

పలుకు కూపిరులూది భావములు పలికించు
నాదమును ఆలింప వీనులను దీవించు!!
నాద రూపా నీదు సంచారమును తెలిసి,
అనుదినము ప్రతి క్షణము ఆలించు స్ఫురణిమ్ము !!

నీ చేతనననొంది చేరియించు నా నాడి,
కుడుచు చేతన విలువ వాసి ఎరుగనిదాయె !
చేతనై లోలోన చేరియించు చెలికాడా ,
చెలిమి కురిసెడి చేయి ఎరుగుండు ఎరుకిమ్ము!!

యోచనల యదలోన సాలోచనగ నీవు ,
సరగు జేయక నిలిచి ఏమేమి చూసావు?
సవరించి నా తెలివి సరిదారి నెరిగించు,
మరలు దారుల దారి నను నీవే నడిపించు!!

ఆనంద మీయగల అమరేంద్ర పతి నీవు,
అనరు అంకురమైన నీ చెంత కనరాదు!
చేరి చింతలు నాదు చెరితెల్ల చిదిమేను,
చిదిమి నా చింతలను చెలిమి నీ రాదా!!

తనువు దొంతుల మాటు మరి నేను మనలేను,
మాటి మాటికి నిన్ను వేటాడి కనలేను!
దొంతి భారము దీర్చి నీ జతను గొనరాదా,
ఒదిగి మాటున దాగు మురిపాలు విడరాదా!!

మంగళాంగా మరువబోకయ
మాలిమేరుగని మనసు నాదని!
మదన మోహన నీదు మహిమల
మోహామొందెడి మోహమీయరా!!

నామ మోహపు రతిన మునుగగ ,
శబరి పొందిన మోహమీయరా!
ఆట బొమ్మన అఖిల జగముల
నాధు గాంచిన మీర మోహము నందజేయర!!

మంగళాంగా మరువబోకయ
మాలిమేరుగని మనసు నాదని!

గొల్ల బాలురు , గోపా కాంతలు ,
రేపల్లె మొలిచిన రెల్లు పూవులు
మోహామొందిన మధుర భావన
భావించి మురిసెడి మోహమీయర !!

మంగళాంగా మరువబోకయ
మాలిమేరుగని మనసు నాదని!

అఖిల లోకము లాదరించెడి,
అతివ అరమరలన్ని వీడుచు,
మొహమొందెడి పాద పంకజ
మోహ రుచిగొన మోహమీయర !

మంగళాంగా మరువబోకయ
మాలిమేరుగని మనసు నాదని!
మదన మోహన నీదు మహిమల
మోహామొందెడి మోహమీయరా!!

ఏనాడూ ఏపూజ ఏ తీరు జేసితినో
ఏమరక ఆ అజుని తలచు తల్లిని గంటి!
వైరి భావము గొనక వాసుదేవుని తలచు,
కులము కొమ్మలనూగు వైభవంబును గొంటి!!

కలికి కన్నుల వెలుగు కామేశ్వరుని గనగ,
లంకె వంకలు లేని నున్ననై నొకదారి,
ఉగ్గు గుడిపెడినాడే ఎరుక పరచినగాని ,
ఉల్లాసమున నొరిగి ఉర్వి మోహము మరిగి,
ఊపిరుల ఊటలను ఇగుర జేసితినయ్యా !
ఉనికి మాసెడి ఘడియ ఉరము నిండెను నేడు,
ఊదినీ నాదమును ఆదరించుము నన్ను!!

ఏనాడు ఏపూజ ఏ తీరు జేసితినో ,
నీ తలపు తలుపగల తనువిచ్చె నాతల్లి,
లోటులెన్నో నేను రేపవలు జేసినా,
ఆ తల్లి తలపులను మన్నించ వలెగాద!!

జగతి వాసనలన్ని నీ ఇంటి పంటేనట ,
మోహపడి కామింప కూడదందువదేల!
మాయ మధురిమ గొనగ జగము నెరపిన నీవు,
మము మాయ విడుడనుచు పంతమాడెదవేల!
మెరుగైన తరుగైన జగతి జీవులకెల్ల ,
తండ్రి నీవే అయిన – తగువార మేగామా!!

వసుదేవ సుత నీదు గంధమంటక జగతి ,
మన నగునె ఘడియైన కుడిచి గంగెంతైనా !
నాకవాసులు మునులు ఘనతకెక్కగ నీవే ,
వారసుల మమ్మేల- చెరల చెలికెదవయ్య !!

ఏనాడూ ఏపూజ ఏ తీరు జేసితినో,
మాయకవ్వలి వాడ నీ లీలలను వింటి!
లాలిత్యమేగాని కరుకుదన మెరుగవట,
కరుణ కురిసెడి కనులు రెప్పలే ఎరుగవట,
పలు కాయముల దొంతి నా ఉనికి మాపెను,
(మాలిమిన నను నీవే నెనరుంచి పాలించు !!)
మాలిమిన మాయమ్మ మనసెరిగి నను బ్రోవు !!

ఏనాడూ ఏపూజ ఏ తీరు జేసితినో
ఏమరక ఏలినను – తల్లి తలుపును దీర్చు ప్రభువా!

దండోరా వేసి తెలుపరే – భవతారణ తరి
దండోరా వేసి తెలుపరే !!
గురుడు లేక గురుతులేదు – గురుతులేక భావుడు లేడు,
తనువులోని తారకుడిని – ఎరుగ నీకు గతి గురువని || దండోరా వేసి తెలుపరే||

ధరణీసుత నాధుడైన – మధురాపురి ధీరుడైన,
గురుచరణము సేవించక – వసుధ నడచు తరి తెలియరు !!

|| దండోరా వేసి తెలుపరే||

తులసి దాసు – రామ దాసు- పాండురంగ విఠలు కొలుచు,
తుకారాము నామదేవు – భక్త మీరాబాయిలైనా ,
తరుణమందు గురుకరుణను పొంది పథముగాంచిరంచు
|దండోరా వేసి తెలుపరే||

దేవేంద్రుడి తనయుడైన – కాల యముని పుత్రుడైన,
పరివారపు పలుచేతల పరిహాసపు చెరిత నడువ,
యదుభూషణు నుపదేశము యదనెంచిన వివరంబును |
| దండోరా వేసి తెలుపరే |

కరము చరిచి చిరత పట్టి గజ్జకట్టి చిందులేసి
జగతి నడచు నరులెల్లరు తెలిసి తెలివి కలుగునట్లు
పలు విధముల పలు తావుల – గురుడు లేక గతిలేదని
| దండోరా వేసి తెలుపరే- భావ తరణ తరి – దండోరా వేసి తెలుపరే ||

.

ఎదురు చూసెడి రోజు – ఎంతకీ రాదాయె !
ఏరువాకలు ఎన్నో కరిగి చెరితలు ఆయే!!

కన్ను తెరిచిన నాడు – ఎరుకున్న లేకున్న,
కలియజూచితి నంత – ఆ జాడ నెరుగంగ !
కంట కనపడకున్న – వెంటనే యుందన్న,
ఎరుక ఏమరకుంటి – అనుదినము దినదినము!!

ఎదురు చూసెడి రోజు ఎంతకీ రాదాయె !

తడబడడుగులు మాని – తీరుగా నడిచినా ,
నడక పరుగుగ మారి – పందెమే గెలిచినా!
సూటిగా ప్రతి అడుగు – అడుగకెరిగిన రోజు,
ఎరిగి ఒల్లని రోజు – ఒల్లకున్నాగాని ఒడిన చేర్చెడి రోజు!!

ఎదురు చూసెడి రోజు ఎంతకీ రాదాయె !

ఉయ్యాల జంపాల ఊపిరుల సైయాట,
ఉరుకున్నాగాని ఊరకుండని ఊట!
ఉనికియై ఉల్లాస మందించు సోహాలు ,
సోలిపోయే రోజు – అహపు ఆఖరి రోజు!!

ఎదురు చూసెడి రోజు ఎంతకీ రాదాయె !

వియ్యాల కైయాల విలువ వీగెడి రోజు,
వీనులందేవేవో విందు జేసెడి రోజు!!
మరుపు మరుగున నలిగి తొలగి నిలిచిన రోజు,
నగి నగీ నాయెదుట నిలిచెడాఖరి రోజు!!

ఎదురు చూసెడి రోజు ఎంతకీ రాదాయె !
ఏరువాకలు ఎన్నో కరిగి చెరితలు ఆయే!!
అందుకొని నా పిలుపు ఎదురొచ్చి కనరాద!!
చందమైనందములు వివరించి గొనరాద!!!

 కరుణించుమో రంగా ! కరుణించుమో !!

 ఏమేరక నీ తలపె – తలపోయు తలపిచ్చి ,

కరుణించుమో రంగా ! కరుణించుమో !!

నాదమందున నిన్నె నిలకడగ నిలుపంగ ,

 నారదుండునుగాను – కరుణించుమో!!

పలుకు పలుకున నిన్ను పలికించి మురియంగ,

సుకమౌనియునుగాను – కరుణించుమో !!

              కరుణించుమో! రంగా- కరుణించుమో!!

ఆటాపాటలనిన్ను – పలుమారు కవ్వింప,

గొల్లబాలుడగాను – కరుణించుమో!!

మురిపెమున దరిజేర్చి – వెన్న మీగడ కుడుప,

గోపకాంతను గాను – కరుణించుమో!!

  కరుణించుమో! రంగా- కరుణించుమో!!

ఏమరక ఏనాడు – నీ నుతుల నుడువంగ,

సురవైరి సుతుగాను – కరుణించుమో!!           (ప్రహ్లాదుడు}

నిక్కముగ నీ పూజ – నిరతమును జేయఁగ,

అంబరీషుడగాను – కరుణించుమో!!

కరుణించుమో! రంగా- కరుణించుమో!!

లాలిపాటలుపాడి – జోలలుపగానిన్ను,

నందు నంగన గాను – కరుణించుమో!!-

పాట పాదముల నీదు – గుణగానమును జేయ,

త్యాగరాజును గాను – కరుణించుమో!!

కరుణించుమో! రంగా- కరుణించుమో!!

రామరామా యంచు – రమియించి మురియంగ,

అనిల నందను (హనుమంతుడు)గాను కరుణించుమో!!

కాలగతులను కనుచు – నీ లీల లెరుగంగ,

కాక భుశుండ గాను – కరుణించుమో!!

కరుణించుమో! రంగా- కరుణించుమో!!

ఏలు వాడవనంచు – ఎరిగించినారెవరో!!

దాస దాసుడవంచు – నిను పొగడినారెవరో!!

ఆటు పోటుల జగతి – ఆటవిడుపట నీకు,

ఆలించి నామొరలు – మరలించి కరుణించు!!

కరుణించుమో! రంగా- కరుణించుమో!!

కరుణించుమో ! రంగా! కరుణించుమో!!

ఏమేరక నీ తలపె – తలపోయు తలపిచ్చి ,

కరుణించుమో రంగా ! కరుణించుమో !!

నమ్మి చేరితి నిన్నే – నెనరుంచవయ్య
దోషమెంచకు నాది – దయనేలమయ్యా
దురిత దూరుడవన్చు – నమ్మినానయ్య ,
దునిమి దుఃఖమునాది – దరిజేర్చుమయ్యా !!

జగతి మిధ్య యనంచు – విబుధులందురుగాని ,
ములుకులై మోహంబు బ్రతుకంత బాధించు,
బ్రతుకు భారంబాయే – వెతలే ఊపిరులాయె ,
ఆదరింపగ నాకు దిక్కు నీవే యంచు …..
నమ్మి చేరితి నిన్నే – నెనరుంచవయ్యా

తోలు తిత్తితనువు నమ్మరాదనంటారు,
నమ్మకుండిన గాని కడుపు కుడుపడుగు,
తొలగిపొమ్మని దాని తొలగించగాలెను,
తగులు తాపము దీర్ప దిక్కు నాకెవరయ్య
నమ్మి చేరితి నిన్నే – నెనరునుంచు

ఆటు పోటులజగతి – ఆటవిడుపట నీకు
గెలుపేరుంగాను నేను ఎప్పుడైనా,
ఓడినా గెలిచినా ఒరుగునేమియులేదు
ఓరిమంతయు నిగెరె ఏలుకొమ్ము!!
నమ్మి చేరితి నిన్నే – నెనరునుంచు

 పలుమారు నిను వేడి – పిన్ననైతిని నేను!

   పలుక వేలయ నీవు  –  ఖగవైరి శయనా!!

  కలికి కన్నుల కోలను – మైమరచి మునిగేవు

  మనుప మాకెవరయ్య – మధురాపురీశా!!

  భక్తమానస పురిన – కోరి చెర చేరెదవు,

 మంతనాలన మునిగి మైమచి  యుండేవు!   

 బ్రతుకు చీకటి చేరన బడలిపోయున్నాము ,

 చెర  బాప మాకెవరు –  భక్తానురక్తా !!

దన్తి మొరలాలించి రయమునుఱికినవాడ!       (గజేంద్రుడు)

పాంచాలి  పిలుపంది రక్ష జేసినవాడ!                ( ద్రౌపతి)

వైరిసుతు గావంగ జగతి నిండినవాడ,                (ప్రహ్లాదుడు)

చేరదీయర మమ్ము  – ఆర్తజన రక్షా!!

సుంకమెవరిదో నీవు  చెల్లింపబోయేవు,!               (రామదాసు)

జూదమాడిన జతను  ఆదుకొన  బోయేవో           (హత్తిరమ్  బాలాజీ )    

 పండరీశా  యన్న  సతి  రూపుఁనొందేవో!            (సక్కుబాయి)

మా  వెతలు  దీర్పంగ  ఒక  రూపు  గొనలేవ!

పలు వరములీయమని పంతమందను నేను,

పరకాయముల నొంది పలుచనౌమని అనను,

 తీరెరుంగని పూజ – తెరువెరుంగని బ్రతుకు,

 తెరపిచ్చి తరలించు – భవతాప హరణా!!

[9:25 AM, 4/26/2025] Savita: సుపర్ణ

వినత పుత్రుడైన గరుత్మంతుడిని ‘సుపర్ణుడు’ అనికూడా అంటారు. శ్రీమహావిష్ణువు వాహనమైన గరుడుడు , ఆయన అనేక లీలలకు ప్రత్యక్ష సాక్షి. ఆయనను స్మరించినంతమాత్రాన ‘విష’ ( దుష్టమైన ప్రభావాలు) తొలగుతాయని అంటారు. అట్టి మహానుభావుడిని ‘హరి కధలు ‘ వివరించమని …

వినతాసుత విని వేగమె
వివరింపగ రాదా!
వరమౌనుల మదిసాగర
మధనంబుల కథలూ!!

సరివారల పరివారము
పలుమారులు పలుకా,
గగనాంతర గహనంబున
నినదించెడి హరికథలూ!

బుధమానస పరిపాలుని
వరలీలల విరులూ!
వరియించిన చరితార్ధులు,
చెరియించిన గతులూ!!

సీతాపతి కననెంచిన
సురవైరుల తపమూ!
వరమౌనులు కురిపించిన,
ఆశీసుల సరులు !!

దితి సంతును దునుమాడగ
ధరకేగిన వరునీ!
వరియింపగ తరుణీమణి,
తలపోసిన విధమూ!

సురశేఖరు సుతుసంతును
సరిగాచిన శౌరీ!
పరివారపు పరిహాసపు
ఫలమాపని విధులూ!

అనిలాత్మజు మదినేలెడి
దశకంఠుని వైరి,
అలరించిన కులధర్మము
నినదించిన విధులు!!

బుుషి శాపము పరిమార్పగ
ధరకేగిన ఘనుడు,
లలనామణి నలరింపగ,
నడిపించిన కథలూ !!

వినతాసుత విని వేగమె
వివరింపగ రాదా!
వరమౌనుల మదిసాగర
మధనంబుల కథలూ!!