భాగ్యము

కలుగు భాగ్యము నీది – కలిగించుమది మాకు,
కరుణా కటాక్షి – ఓ కమలాక్షు నింతీ!
కామజనకుని మదిన కదలు భాగ్యము నీవె,
కలుగ నీ సంగంబు – సకలంబు మరచీ!

తరుగు కాలమువెంట – తగని పరుగుల తోన,
తరియింతుమని ఎంచి – తరలేటి మేము,
తామసోల్లాస హరు – తలుప నెంచే తీరు,
తెరవు తెలుపవె మాకు – తోడు నిలచీ!

హరుని రాణివి నీవు – హరియించు తాపముల,
హరిమోహమందించి మనుపు మమ్ము!
హుంకరించెడి మాయ యూధంబు హరియించి,
హరిసేవ నెరిగించి పాలింపు మమ్ము!