తెరుపు – మరుపు

తెల్లవారిన వెలుగు సందడి తట్టిలేపిన మేలుకొల్పుకు,
చెదిరి కలలిక కనులు విప్పితి కటిక చీకటి తొలుగగా!
వెలసిపోయిన వన్నెచిన్నెల కలల తలపులు తోచగా,
హాసరేఖలు మొలచి మోమున మురిపెమెంతో నిండగా!

                తోటివారట సాటివారట నమ్మి నడచిన బంధుజనులట,
               పంతమేదో పొంతనేదో పొదిగి అల్లిన చిక్కు వలల లో, 
               అల్లిబిల్లిగ ఆడుకొనుచూ  అదుపు మరచిన ఆదరంబున,
               సొంతవారని వీడబోమని నమ్మబలికిన చెలిమి బాసలు,
               రెప్పమాటునె మిగిలిపోయెను రేయిగడచిన వేళలో! 

|| తెల్లవారిన వెలుగు సందడి తట్టిలేపిన మేలుకొల్పుకు,
చెదిరి కలలిక కనులు విప్పితి కటిక చీకటి తొలుగగా! ||

కనుల నిండిన ఆదరంబున కబురు తెలిపే కన్నకూనలు,
కనులు పండగ కంటిమంటూ కలువరించే కన్నపేగులు,
కటిక చేతల కబులురులెన్నో కూర్చి పేర్చిన కొలువు దారులు,
వాటమిదియని వొదిగి ఎదుగని వెన్నునిమిరిన తోటి చేతలు,
జాడవీడకె కరిగిపోయెను కనులు వీడిన వేళలో!
|| తెల్లవారిన వెలుగు సందడి తట్టిలేపిన మేలుకొల్పుకు,
చెదిరి కలలిక కనులు విప్పితి కటిక చీకటి తొలుగగా! ||
నేటి నిజమిది నాటినిజమది ఏది నిజమని నమ్మెద?
నమ్మదగినా మర్మమేమని నమ్మి ఎవరిని ఆడిగెదా?
ఎదిగి ఎరిగిన వారు నమ్మిన మనసు మర్మము నెరుగగా,
మాయపొంతన పొందుదారుల మనుగడెంచగ మాననా!
రెప్పమాటునె నిలచు వానిని ఎరిగి కన్నులు నిండగా!
తెల్లవారిన వెలుగు సందడి తట్టిలేపిన మేలుకొల్పుకు,
చెదిరి కలలిక కనులు విప్పితి కటిక చీకటి తొలుగగా!
వెలసిపోయిన వన్నెచిన్నెల కలల తలపులు తోచగా,
హాసరేఖలు మొలచి మోమున మురిపెమెంతో నిండగా!