సుప్రభాతం

సుప్రభాతంబిదే సురలోక వంద్య ,
సుప్రభాతంబిదే సిరిమానో భాసా ,
సుప్రభాతంబిదే గోపాల బాలా ,
సుప్రభాతంబిదే గోదార్చితా హరి !!

సుగుణాభి రాముడని – సీతా మనోహరుడనీ,
కౌసల్య తనయుడని – కరుణా సముద్రుడనీ,
దశరథాత్మజుడనీ – దశకంఠ హారి యని,
ధరణి నడచినయట్టి నారాయణునికిదే –
సుప్రభాతం – సుప్రభాతం || సుప్రభాతంబిదే సురలోక వంద్య ||

గోపాల బాలుడని – గోపికా లోలుడని,
సురవైరి హారియని – సున్దరాకారుడని ,
దాసాను దాసుడని – ద్వారకాధీశుడని ,
గీతామృతమునొసగు గోలోకవాసికిదే –
సుప్రభాతం – సుప్రభాతం || సుప్రభాతంబిదే సురలోక వంద్య ||

కలి కలుషహారియని – కరిరాజ వంద్యుడని ,
తిరుమలాధీశుడని – తిరునామ పూజ్యుడని ,
వడ్డి కాసుల నెంచి పాలించువాడని ,
కన్నె గోదార్చనకు వరుడైన విభునికిదే –
సుప్రభాతం – సుప్రభాతం|| సుప్రభాతంబిదే సురలోక వంద్య||

సుప్రభాతంబిదే సురలోక వంద్య ,
సుప్రభాతంబిదే సిరిమానో భాసా ,
సుప్రభాతంబిదే గోపాల బాలా ,
సుప్రభాతంబిదే గోదార్చితా హరి !!