కళ్యాణ మాడెనట వేభవముగానూ – జగదంబ జగముకై పరమేశు ప్రతులా!
సీతమ్మ మనువాడె రామచంద్రుణ్ణి – శ్రీలక్ష్మ మనవాడె శేష శయనుణ్ణి,
గౌరితా మనువాడె రుద్ర రుపుణ్ణి – గాయత్రి మనవాడె బ్రహ్మదేవుణ్ణి! !కళ్యాణ!
పసిడి లంకన బుట్టి జనకునింటన పెరిగి – అవతార మూర్తియౌ శ్రీరాము మనువాడి,
కౌసల్య కోడలై దశరధుని పురమేగి – మోద మొందించెనట పురజనుల నెల్ల ! !కళ్యాణ!
నారాయణు నంబుచే ముక్తి నొందగ నెంచి – రాక్షసత్వము నంది తపియించు రక్కసులు,
కైక మనసున జేరి తమ తంతు నడిపించి – కాననకు గొంపోయిరా దంపతులను! !కళ్యాణ!
మైధిలిని హరియించి మనువాడుతా నంటె – మనుజ నైజము వల్ల రోషపడి శ్రీహరి,
వేగపడి తన తనువు హరియించు నంచు – మాయ నరపిన వాని మోహమొందించె! !కళ్యాణ!
తన భక్తునేనాడు ఎడబాయనా హరుడు – బంటుయై నడయాడి శ్రీరాము సేవించి,
యుక్తిగా తన భృత్యు నాదుకున్నడు – రావణుని తపమునకు వన్నెతెచ్చాడు ! !కళ్యాణ!
జంట వీడమటంచు ధరణి జేరినవారు – కారణంబేదెైన ఎడబాటు నొందారు,
ఎంత వారలకైన తప్పనీ వేదనను – చాటి జెప్పెడి చరిత సందేశమేమో! !కళ్యాణ!
దిక్పాలకుల సేవలనుదినంము అంది – ముని మనోధామముల మన్ననల నందు,
శేష తల్పపు విభుడు వరియించగా మురిసి- సిరి తాను మనువాడె వాసుదేవుణ్ణి ! !కళ్యాణ!
పలు సంకటము లందు మనలేని వారు – శరణు శరణని వేడ వేదనల దీర్ప,
అనుదినము అతిధిగా అరగేటి వాని – వెన్నంటి తిరుగుటే సిరికి శరణాయె! !కళ్యాణ!
ముల్లోకములు మెచ్చు లావణ్య రాశి – ముచ్చటగ పతిగూడి మురిపెమున దేల,
పలు వింత రూపముల మసలు నాధునికై- సుర సౌఖ్యముల విడచి చెరియింపనాయె! !కళ్యాణ!
క్షీరసాగరమందు బుట్టినా పసిడి – వరియించె విష్ణడని మురిసేను గాని,
దినదినము జాడకై వేసారు తల్లి – ఎరుక జేయగ నెంచు భావమది ఏది? !కళ్యాణ!
నగరాజ కన్యగా అవతరించిన శక్తి – తపియించి వరియించె ఫణి భూషణున్ని,
ప్రమధులను, అసురులను, గుణహీనులైనా- ఆదరించెడు గొప్ప మనసున్నవాడంచు! !కళ్యాణ!
హరహరా యనగానె వరములను కురిపించి – లంపటము లందగులు పెనిమిటిని గావగా,
చండికై, కాళికై, దుర్గయై, శాంభవై – దుందుడుకు దైత్యులను దునుమాడె నంట! !కళ్యాణ!
సంతు యందాశ గొని నలుగు బాలుని గంటె – తల నరికి గజము తల కూర్చి వేడిన పతికి,
జగమంత తన సంతు కరుణ గొను మంచు – మారు వరముల నొసగి మన్నించు కుంది! !కళ్యాణ!
జగమేలు జగదంబ జంగమయ్యను వలచి – మనువాడినా విధులు కధలు కధలాయె,
తనకు తప్పని విధులు తరుణులకు తగవంచు- నోములందెడి పడతి భావమది ఏది? !కళ్యాణ!
శృతులు పలికిన వాడు శ్రీహరికి కొమరుండు – శృష్టి నెరిపెడి వాడు వాసుదేవుని బంటు,
జ్ఞాని యని మనసుపడి మాతంగ ముని కన్య – వాణియై మనువాడి వాని జతజేరె! !కళ్యాణ!
విస్తరించెడి జగతి అణువణువు రచియించి – హరిహరుల ఆనతుల పరిధిలో వర్తించి,
నిత్య నూతనమైన జటిల కార్యములందు – తల మునకలౌ పతికి తన సేవలందించ, !కళ్యాణ!
తలరాత లోపమని అనుదినము నిందించు – పలు దూషణము లెంచు ప్రజనెల్ల లాలింప,
ప్రగ్య యై వ్యాపించి మన్ననల అందించి – తన విధిని వర్తించు హంస వాహిని వాణి ! !కళ్యాణ!
అనుదినము నాదమై నాధుదరి జేరినా – ఇసుమంత తరియైన తీరికెరుగని వాని,
ఇల్లాలిగా మెలగ భాగ్యమేమని విందు? ఎరుక నెరిగించు కధ ఏమి తెలిపేను? !కళ్యాణ!
Yakshavani 