సాధుజన సంచారి సరసుడని ఎంచేవు – సావధానము నొందు మనసా!
సమయ సారధి వాడు – సమవర్తి – అచలుండు – ఆనందరూపుడట తెలుసా?
గోపకాంతల జేరి గోరుముద్దలు మెక్కి – రాధికా మది దోచి ఆటలాడి,
మధరుకరిగెడినాడు మధుర హాసమె దక్క- ఊరడించెడి మాట మరచినాడు!
నగకన్య చై బట్టి నగరి నేలెడి వాని – నటవైభవపు తీరు తెలియరాదే!
అర్ధ దేహము బొంది అర్ధాంగి యగు అంబ – భక్తవరదుని ఇడుము లీడ్చుగాదే!
కోరికొలిచెడివాని కామితము చెల్లింప – తనయు తల తృంచగల తండ్రి వాడు!
కాము దేహము గాల్చి – కామించగల వాడు – కార్యకారణ సంధి దృంచువాడు!
నలవిసము నందుకొని కంఠమందున నిల్పి – లోకాల నిలుపగల ఒజ్జవాడు!
కాలి గజ్జెను కదిపి -డమరుకము మ్రోగించి – విలయ విన్యాసముల నెరపువాడు!
ప్రమధాధిపత్యముకు పందెమేసిన వాడు – తనయు సామర్ధ్యంబు నెరుగ లేడా?
శరణన్న గణపతికి ఉపదేశమందించి – విజయు జేసిన వాని వైనమెరుగు!
హరి మోహమున మునిగి మోహమొందెడి వాడు- మదను మాపినవాడు క్రోధి వాడు!
కామాక్షి కట్టడికి సర్వ మొడ్డిన వాడు – వల్లకాటిన వసతి నొందువాడు!
విష్ణు పాదపు వరద – తలను తాందవమాడ – తమక మొందెడివాడు అజుడు వాడు! (అజుడు = ఋషి)
విషధరుడు – విజ్ఞాని – వైద్యనాధుడు వాడు – రూప రసముల తీరు లేనివాడు!
సాధుజన సంచారి సరసుడని ఎంచేవు – సావధానము నొందు మనసా!
సమయ సారధి వాడు – సమవర్తి – అచలుండు – ఆనందరూపుడట తెలుసా?
Yakshavani 