తుది తోడు

యమదండన నమలు జేయ – దూతలు ముంగిట నిలచిన,
మూగెడి వేదన వెరపున తెరపెరుగక పలుక లేక పలుకక యుంటే,
ముందటి పూజల పుంతలు అక్కర కొక్కటియురాక తరుగైపోతే,
తోడుగ నే నున్నానని నగుమోము జూపి నన్ను మనుపగరాదా!

నిండితివట లోకంబుల నిండుగ నీవెల్ల జగము నిండుగనుండ,
నిగిడిన తేజము గల్గిన నిర్మల నభ లోచనముల లోకముజూడా,
నిను నే నెరుగుట చోద్యము నీ వెరుగక పోవుట చోద్యము,
చోద్యపు చేష్టల మానుక చేరుము నా చెంతనీవు చింతలచిదుమ!

పున్నమి కిరణము సోకగ పులకించెడి పుడమి పైని మొలకవు గావె,
మొలచిన మొగ్గల బుగ్గన మురిపెముతో ముద్దాడెడి తెమ్మెర గావె,
తరలుచు మరలుచు జీవుల జీవంబును నిలువరించు ఊపిరిగావె,
ఎన్నగ నెరుకకు రానా ఎరిగింపగ నీవు దలుప వెరపును బాపా!

వాదము లాడగ తగునా తరుగగు పలు దాసజనుల తోడుగ నీకు,
వేదన బాపెడి దొరవని వెరపును మాపెడి సఖుడని వేడిరె నిన్ను,
మిన్నక యుండుట తగునా మిన్నగు యోచన తరుగని విశ్వుడ నీకు,
కన్నుల కనగల తీరున కనికరమున పొడగట్టుము భవభయ హరణా!