పాల పుంతల దారి పలుమారు నడిచినా ,
పాలుపోదయ – జగతి నడిచేటి విధము!
జోలలూట మాని జగతి నడతను గనుము,
జోగి ఊగుచు – నడత తూగి తూలేను!!
తండోప తండాల జనులు నీ గుడిముందు,
నిలచినారయ నిన్ను కొసరి కొలువంగా!
పట్టెడన్నము పుట్ట ఇక్కట్లు పెక్కాయె,
భక్తి కాదయా వారి బ్రతుకు భయమాయె!!
జోలలూట మాని జగతి నడతను గనుము,
జోగి ఊగుచు – నడత తూగి తూలేను!!
భోగాల నిను ముంచి సేవించినేగాని ,
బ్రతుకు గడులను గడప తోడీయబోవంచు,
పంచ ధాతువులంది పూరించినా పురిని
పలు ఇడుములన వ్రేల్చి వేడుకొందురు నిన్ను !!
జోలలూట మాని జగతి నడతను గనుము,
జోగి ఊగుచు – నడత తూగి తూలేను!!
మోసాలు వేషాలు కలత కావేషాలు ,
కొమ్మ రెమ్మలు విరిసి విస్తరించిన జగతి,
జాలి దయ యను గొప్ప భావమందినవారి
జాలి ఇంచుక లేక దురితముల కూరేను!!
జోలలూట మాని జగతి నడతను గనుము,
జోగి ఊగుచు – నడత తూగి తూలేను!!
పాలసంద్రము చిలికి పలు సంకటములోర్చి
పట్టి తెచ్చిన అరకు ధన్వంతరి మరచేను!
ఫాలాక్షు నూపిరుల కంఠమందలి అరకు ,
కట్టడెరుగక జగతి సంచరించేను !!
జోలలూట మాని జగతి నడతను గనుము,
జోగి ఊగుచు – నడత తూగి తూలేను!!
వేడుకున్నా కసురుకున్న ఆగదాయెను కాలము
తప్పుకొనగా దారిలేదని కనులు కురియుట ఆగదు,
కన్న వాడవు కాచువాడవు కలిగియుంటివనెంచినా ,
ఇన్ద్రియంబులు ఎరుగునటు నీవేలనో యేరుగుండవు !!!
జోలలూట మాని జగతి నడతను గనుము,
జోగి ఊగుచు – నడత తూగి తూలేను!!
Yakshavani 