కల

17th May 2026 :కలలో పూరి జగన్నాధ విగ్రహం నాదగ్గిరకి వొస్తూ – ఒక తెల్ల లాల్చీ , పంచెకట్టు తో ఉన్న ఆజానుబాహుడైన 50+ వయసు కల పురుషుడిగా నాదగ్గిరకు వొచ్చి, నన్ను వెంట బెట్టుకుని బ్యాంకు కౌంటర్స్ లాగా ఉన్న అనేక కౌంటర్స్ తిరుగుతూ , నా విషయం ఏదో అడుగుతున్నాడు. నాకు ఏమి వినిపించలేదు – కానీ ఆయనను చూస్తూ , వెంట తిరుగుతున్నాను. …. అదే ఈ కవిత …

కలలోన కనిపించి మరుగైన ఫలమేమి !
కలిగుండవలె నయ్య ఇల కనులయందు!!

రెప్ప లేనాకనులు నా కనుల రెప్పలలో ,
ఎక్కడో ఏమూలో ఒదిగి దాగగ నేల?
రెప్ప లానినిన కనులు కనిన ఆ అందాలు ,
కురియవే నా కంటి కనుపాప పైన !!

జత గట్టి నాతోన అడుగులేసిన జాడ,
జంటగా నా వెంట సంచరించిన జాడ ,
వెంట గోని నీ ఉనికి నన్ను నడిపిన జాడ,
కల కరిగినాగాని కరుగకున్నది కనుల !!

నిను గన్న సంతసము తనువంత తడుపంగ,
కనుల జేరెనో ఏమో ఇన్ద్రియంబుల ప్రజ్ఞ !
నీవాడు వచనాలు సోకవైతివి చెవిన,
సోకునీ వస్త్రంపు హాయిగొనదీ తనువు!!

లీలావినోదుడా – ఆడ నే లీలలలను ,
పలుమారు పదుగురిని వివరముల నడిగేవు !
వివరమడుగగ నీవు ఎవరనెంచిరో వారు,
వారు వీరని నిన్ను పలు దెసల పంపేరు!

దశ దిశల దిశ దిశన తీరి నిలచిన నీవు,
ఏ దురితములు మాప దయబూని దరిజేరి,
రెప్పలానిన కనుల సంచారమొనరింప ,
సంగతేదో గాని సంగమును విడబోకు!!

కర్మలెన్నో కూడి కొండలై నిలిచినా ,
నీదు నెయ్యపు చ్ఛాయ చేరవొచ్చెను నన్ను!
చెదరనీయకుమైయ్య చెలిమి సంగము నెపుడు,
చేదుకొని ఓదార్చి – కుడుపు చెల్వమును !!

కనురెప్ప పరదాలు పలుమారు మూసెదను,
కనికరము గొనినీవు మాటువిడి మురిపించు,
మంతనాలేవైన మనుప మా గతినీవే !
మదనాంతకుని మనసు మురిపించు వాడా!