ప్రేమ!

బదులు రాదని తెలిసి – కబురు పంపుటె ప్రేమ,
కొరత వెలుతుల కొలత – కొలువ నెరుగదు ప్రేమ!
మాయలోకపు మడుగు – ఏ సుడుల ముంచెనని ,
మాయ మెచ్చెడివాని – గురుతు నెంచుటే ప్రేమ !!

ఫలము తెలియని కర్మ – కోరి చేయుటె ప్రేమ,
కర్మ కూర్చెడి ఫలము – కొలత నెన్నదు ప్రేమ!
కర్మ ఫలములు కూలి – కొల్లపోయిననాడు ,
కాల కాలుని ఉనికి – తలపు నెన్నుటే – ప్రేమ!!

తొలగిపోవు ననెరిగి – తగిలియుండుటే ప్రేమ,
తగిలున్న బంధముల – బలము నెన్నదు ప్రేమ!
తొలగి బంధములన్ని – తరలిపోయెడి నాడు,
భవబంధ మోచనుని – జాడ నెరుగుటే – ప్రేమ!!

ఫలమందనని ఎరిగి – తరువు నాటుటె ప్రేమ,
తరువు ఫలముల నందు – పరులనెంచదు ప్రేమ!
శ్రమ సంకటములేక – ఫలమందువానిగని ,
పరమ ఫలమగువాని – ప్రేమ తెలియుట – ప్రేమ!!

తలుపవే ఓ మానస – ఆ ప్రేమ మధురిమలు ,
అవని ఆవలి అంచు – దాటి చనువరకు !!